Mkpuru edemede Igbo

Advertisements

Igbo enweghi eze!

Igbo enweghi eze bu okwu mpako,hoha!.Mpako bu mmadu i buli onwe ya elu.Mpako na ebute i leda mmadu ibe gi anya ma o bu kwanu i kpo mmadu ibe gi ihe efu.Ozo,mpako na ebute oke ochicho i ji zaa o chiri ozuo. Nke a jogburu onwe ya.I lee anya na ala Igbo taa,i ga ahu na otutu umu okorobia na umu agboghobia anyi e jila ndu o loro ohuru ,”i dika ibe” wee tinye onwe ha n’onodu nmekpa ahu kariri akari.

A si na Igbo enweghi eze,nke o kwesiri i butara anyi afo ojuju ka o bu ndu ihe efu.I si na otu ndi enweghi eze na achikota ha,n’uche aka m,abughi ezi ihe.Site na mbu ka eze ji wee diri na uwa.O dika ezi n’ulo enweghi nne na nna ma o bu otu na enweghi onye isi,otu o bula i siri tulee ya,o dighi mma.Mba o bula kwesiri inwe onye nchikota,onye isi,onye ndi obodo na egere nti.o bu kwa nu ihe itunanya na Igbo nile enweghi otu olu?Onye o bula bu eze nke aka ya. Mpako we buru usoro ndu ndi Igbo,na aza eze onye agwala m okwu. Bikonu Igbo ndi oma,o ruola mgbe anyi ga eleba anya n’okwu a.Usoro a adighi mma.

Ndi Igbo bu kwanu ndi agoziri agozi,ndi Chineke choro mma puru iche,ndi amamihe zuru ahu,mana anyi ewerela oke mpako wee mebie onyinye amara nile Chineke nyere anyi.Akwukwo nso gwara anyi si:O buru n’iweda onwe gi ala,Chineke ga ebuli gi elu.Ozo kwa;Iwe Chineke nokwasiri n’ahu ndi mpako.O ga abu na iwe Chineke di oku n’ebe ndi Igbo no?Amaghi m asisa ajuju a mana ihe m ma bu na o buru na anyi ewetuo onwe anyi na ala,Chineke ga ebuli anyi elu.Ndi Igbo bu kwanu uburu na igwe ji oganihu na aku  Naijiria. Mpako emela ka umu Igbo na amanye aka n’ihe ojoo digasi iche iche.I lee na ndi na ebu ogwu iwu obodo megidere,ndi na emeputa mmanya na umu ihe ndi ozo na enweghi ihu,o bu ndi Igbo,ndi ntoo mmadu,ndi ogwu ego,ndi akwuna,ndi na ere umu amuru ohuu,o busi ndi igbo kwu n’azu ihe ojoo nile a.

Ndi Igbo wepunu aka enwe n’ofe tupu o gho aka mmadu.Ka anyi werenu onyinye amamihe anyi mee ezi ihe.Ufodu umu Igbo no n’Aba na agba mbo imeputa otutu ihe ndi di mma dika uwe,akpo ukwu na ihe ndi ozo.Ndi Igbo na agba mbo.Ka anyi gbanu ezi mbo,ju ekwensu na olu ya nile.O cho ihe ukwu ga anya aba enyi!Okuko nti ike ga anu ihe n’ite ofe. Chetakwanu na mpako buru uzo,odida esoro ya.Udo diri unu!

I di n’otu

Igbo nmanma nu ooo. Umunne m biko nu,ka anyi tinyetu kwanu onu n’ihe gbasara idi n’otu n’ala Igbo.I legharia anya n’ala Igbo,o ga edo gi anya na idi n’otu,udo na otu obi agbafuola na ala Igbo. Oge m di na nwata,anyi na akpaghari  ka o siri masi anyi n’ime obodo.I banye n’ulo onye agbata obi gi,i rijuoro onwe gi afo,dina ala rahu ura ma icho,gi na umuaka ibe gi egwuria egwu,gba egwu onwa,uwa wee na aga siriri werere.

Mana egwu agbanwela,n’eziokwu enweghi m ike izoro ukwu banye n’ulo onye agbata obi m dika n’mbu,nodu ala,nuo mmiri ma o bu rie nri.Ihe nke a jogburu onwe ya.Oke ihe ojoo abatala n’etiti anyi.I ga anu akuko di iche iche i nweghi ike ikwu chi m na ala kpaa isi okwu ha mana akuko ndi a bu ya wetara iro n’etiti ndi Igbo.Otutu ihe emebiela,okenye enweghi kwa ike i bara nwatakiri mba nkiti,i nweghi di ike ikele ekele,ahapu iko ka amusu si ,si na ekele gi ahu aru oru ya.Ihe nke a juru m anya,tuo m n’anya mana na agbowa m obi. Onodu anyi adighi nma ma otu.Kedu ihe emere ihe nke a umunnne m.Biko gi nwa afo Igbo tinye onu na okwu a ka anyi choputa ogwu oria nke a na acho ikpochapu mba Igbo nile.

Onye ma ihe anyi nwere ike ime i ji gbanwee o biara ohuu nke a ,biko kowaputara anyi n’ebe a.Igbo ndi nwe mmadu,o gwucha kwa ka o ha m n’onu.Ndeewonu!

Nma! (Beauty!)

 

Kpo ya opuru iche,ihe efu  (Call it unique,call it vain)

Were ndi Muo ozi tunyere ya,  (Liken it to angels)

Kpo ya ihe di oke onu,ihe na agafenari   (Call it higly prized, call it fleeting)

Were kwa eke nile tunyere ya   (Liken it to nature)

Nma di nno ebube    (Beauty is simply divine)

O kariri ihe eji anya ahu   (It is beyond the physical)

O di ezigbo omimi mana nwekwa ihu   (It is strictly deep yet visible)

O na enye ma onwe ya,nwekwa ihunanya (It is giving,selfless ,loving)

Ezigbo nma bu nke si n’mkpuru obi   (True beauty is of the heart)

Nma bu nke eziokwu di ebube      (True beauty is divine!)

O buru na ala anyi ga aburu anyi ebe obibi n’ezie  (If our land will indeed be a place worth living)

Ka anyi na azu nma nke a          (Let us nurture this beauty)

N’ihi na o bi n’ime anyi       (For it dwells within us)

Omumu

Omumu bu onyinye chukwu,o sighi aka mmadu abia.Ihe kpatara m ji ede maka omumu taa bu ihi akuko otu nwata nwanyi koro m ugbu a,onye di ya na umunne di ya chupuru n’ulo n’ihi amutaghi nwa ka afo isii gachara e ji luta ya.A huru m ya n’ulo ogwu ebe m gara i leta enyi m nwanyi muru nwa ohuu.

Ya na enyi m nwanyi ahu no n otu ime ulo. Oge m kpewara ekpere ikele chineke onye nani ya na enye nwa,o sonyere anyi na ekpere mana na ebe akwa. Agbaliri m kpecha ekpere ma gaa n’ihu iju ya ihe kpatara o ji ebe udi akwa nke a ebe o kwesiri i na anuri.O si mu hapu ya ka ya bee akwa n’ihi na o bughizi akwa ariri ma o bu nke obi ngbowa na o bu akwa onu na obi oma.O gwara m na ya luru di mbu ya afo asato gara aga wee no n’ulo di ya afo isii na atughi ime ma oli.O kwuru na ya gara ulo ogwu nile ama ama n’obodo ha bi ma onweghi dokinta choputara ihe o bula ga egbochi ya amula nwa. Kama o gwakwara m na di ya agaghi ule ahu nke ya.O kwuru na di ya si na ahu zuru ya oke,na ya atuola otutu umu nwanyi ime,ya mere o nweghi ka o buru ya kpatara amughi nwa ha.Ka ihe ndi a nile na aga,umunne di ya wee buru agha so ya,na akwa ya emo kwa ubochi,kpo ya akwuna,ko ya onu ka o si wepu akpa nwa ya,kpo ya nwoke no n’udi nwanyi.O koro m ka ya si lota uka otu ubochi wee hu akpati ya nile n’ ezi ebe mmiri na ama ha.O kporo papa ya n’ekwe nti,o wee dunye nwanne ya nwoke ka o bia bulata ya ulo.Otu a ka alu m di na nwunye ya na di ya ji gbasaa.
O kwuru na o di ya ka uwa ya o bidoro n’isi mgbe ahu.Di ya wee lugharia nwunye ozo,olileanya nile ya nwere ilaghachi wee bie oge o nuru maka ya.O si na ya hapuru obodo ahu,we nweta oru n’obodo ozo,ebe ya no we hu nwoke ya na alu ugbu a.Nani onwa abuo ka ya na di ya biri tupu o turu ime wee muo umu ejima,nwoke na nwanyi.O si na ya nuru na di ya na nwunye ohuru ya ka na acho nwa.

Ihe nke a riri m onu,ju m anya mana ekele kwara m Chineke onye nani ya na enye nwa. Onye ka o di kpatara amughi nwa ha. Onye o soro ya buru,nke m bu onye ejila ihe mere mmadu ako ya onu. Ndi Igbo bikonu onye ejila onodu amughi nwa ako mmadu onu.#Onyemaechi .#Onyebuchibeya.#Chinenyenwa. #Uwaezuoke. #Nwabuonyinyechukwu.

Ilu Igbo

Ilu,Ilulu?Kedu ihe unu na akpo ya na obodo unu? Mama m na atu ilu nke ukwu.O nweghi ihe o naghi atunyere ilu.O si na ya siri na aka nna ya muta itu ilu.O nwere ndi o ga abu o tuo ha,echebara m ha ezigbo echiche.Ilu Igbo dikwanu omimi i gwa gi ezi okwu.Ka m tuoro unu ndi nke m chetara.I nwe ike kowa ya ka anyi mara ma i ghotara ha.Ma chetakwa na ala Igbo asi na onye aturu ilu ma kowara ya ilu ahu,bu onye ego e ji luo mama ya lara n’ihi. ochi atogbu m o .

  1. Onye a si leruo anya n’ala,asighi ya wuru mkpuru anya ya wusa n’ala
  2. Ukwa rue oge ya,o daa
  3. Iwe nwanne anaghi eru n’okpukpu
  4. Eze ana aria aria biakwara juo akwu ure
  5. Nkiti anaghi agba ihe ya
  6. Otu onye anaghi aza nnaoha
  7. A sokata eze anya, e kpuru nkata n’isi gwa ya okwu
  8. A nyukota nmamiri onu,o gbaa ufufu
  9.  E gbukota cha ahu,ahu na afo kwa
  10. A naghi asa nkiti okwu

Dee nke gi ma o bu gbalia kowa nke m dere ebe a

Igbo amaka umunne m…

Onwa ohuru

nov

Taa bu mbido onwa ohu

Onwa Novemba nno!

Mee onwa a ka o puoro gi iche
N’agbanyeghi ubochi ojoo
ma o bu obi ojoo onodu obodo anyi
na ewatara anyi nile ugbu a
Kwuwa isi gi oto
mee onwe gi obi anuri
Nani onye di ndu ga echekwanu banyere echi
Taa bu ncheta omumu ada m nwanyi
Obi bu m so anuri
Ekele nile diri Chineke onye na enye omumu
A na m ario kwa ya ka o zaa di na nwunye nile
na ele anya ya maka mkpuru nke afo.
Unu ga aturu,unu ga ekuru n’aha Jisos.Amen
Igbo amaka.